Itnna Maloom Hai! – Perveen Shaakir

Smile September 21, 2011 2

Poem Itna Maloom Hai! has been taken from the book Khushboo written by the Perveen Shaakir.

Itna Maloom Hai!

Apne bistar pe bohat dair se mein neem daraaz
Soachti hoon ke woh is waqt kahaan per ho ga
Main yahaan hoon magar us kucha-e-rang-o-boo mein
Roaz ki tarah se woh aaj bhi aaya ho ga
Aur jab us ne wahaan mujh ko na paya ho ga!?

Aap ko ilm hai, woh aaj nahin aayi hain?
Meri her dost se us ne yehi poccha ho ga
Kiyon nahin aayi woh – kiya baat hui hai aakhir
Khud se is baat pe so baar woh uljha ho ga
Kal woh aaye gi tou main us se nahin boloon ga
Aap hi aap kai baar woh rootha ho ga
Woh nahin hai tou bulandi ka safar kitna kathan
Seeariyaan charte hoye us ne yeh soacha ho ga
Rahdaari mein, hare lawn mein, pholoon ke qareeb
Us ne her simt mujhe aan ke dhoonda ho ga

Naam bhoole se jo mera kahin aaya ho ga
Ghair-mehsoos tareeqe se woh choanka ho ga
Aik jumle ko kai baar sunaya ho ga
Baat kerte hoye so baar woh bhoola ho ga
Yeh jo larki nayi aayi hai, kahin woh tou nahin
Us ne her chehrah yehi soach ke dekha ho ga
Jaan-mehfil hai, magar aaj, faqat mere beghair
Haye kis darjah wohi bazm mein tanha ho ga
Kabhi sannatoon se wahshat jo hui ho gi use
Us ne be-sakhtah phir mujh ko pukara ho ga
Chalte chalte koi maanoos si aahat paa ker
Dostoon ko bhi kisi uzar se ruka ho ga

Yaad ker ke mujhe nam hui hoon gi palkain
“Aankh mein par gya kucch” kah ke yeh tala ho ga
Aur ghabra ke kitaboon mein jo li ho gi panah
Her satar mein mera chehrah ubhar aaya ho ga
Jab mili ho gi use meri alalat ki khabar
Us ne aahistah se deewaar ko thama ho ga
Soach ke yeh, behal jaye pershani-e-dil
Yunhi be-wajah, kisi shakhs ko ruka ho ga!

Itifaqan mujhe us sham meri dost mili
Main ne poccha ke suno – aaye the woh? Kaise the?
Mujh ko poccha tha? Mujhe dhoonda tha chaaroon jaanib?
Us ne ik lamhe ko dekha mujhe aur phir hans di
Us hansi mein tou woh talkhi thi ke us se aage
Kiya kaha us ne – mujhe yaad nahin hai – lekin
Itna maloom hai, khawaboon ka bharam toot gya!

2 Comments »

  1. Saad September 22, 2011 at 4:19 AM - Reply

    Yaad ker ke mujhe nam hui hoon gi palkain
    Aankh mein par gya kucch” kah ke yeh tala ho ga

    gud 1

  2. Ravish! September 22, 2011 at 2:27 PM - Reply

    great poem g……….Parveen Shakir hai e kamal ki shaira……another piece of her poetry
    Woh aik lafz ki khushboo na rakh saka mehfooz
    main us k hath main puri kitab kya daiti…….

Leave A Response »


− one = 7